ਖ਼ਿਆਲੀ ਪੁਲਾਓ... ਅਮਰ 'ਸੂਫ਼ੀ'
sufi.jpgਨਹਿਰ ਕਿਨਾਰੇ ਡੇਰਾ ਇਕ ਬਣਵਾਵਾਂਗੇ।

ਉੱਥੋਂ ਅਪਣਾ ਕਾਰੋਬਾਰ ਚਲਾਵਾਂਗੇ।

ਜਲ ਦੀ ਸ਼ੀਸ਼ੀ ਦੇ ਦੇਵਾਂ-ਗੇ ਮੰਤਰ ਕੇ,
ਦੁਖੀਆਂ ਦੇ ਘਰ ਵਿੱਚੋਂ ਭੂਤ ਭਜਾਵਾਂਗੇ।

ਆਓ, ਜਿਹੜੇ ਘਰ ਵਿਚ ਤੋੜਾ ਬੱਚੇ ਦਾ,
ਸੁੰਨੀ ਗੋਦੀ ਦੇ ਵਿਚ ਲਾਲ ਖਿਡਾਵਾਂਗੇ।

ਜਿਹੜੇ ਘਰ ਵੀ ਭੋਰਾ ਬਰਕਤ ਰਹਿੰਦੀ ਨਾ,
ਉੱਥੇ ਧਨ ਦੀ ਪੂਰੀ ਛਹਿਬਰ ਲਾਵਾਂਗੇ।

ਘਰ ਦਿਲ਼ ਲੱਗੇ ਨਾ ਜਿਹੜੇ ਨਰ ਨਾਰੀ ਦਾ,
ਭੋਰੇ ਦੇ ਵਿਚ ਉਸ ਦਾ ਦਿਲ ਬਹਿਲਾਵਾਂਗੇ।

ਤਸਕਰ, ਗੁੰਡੇ, ਆਗੂ, ਚੇਲੇ ਮੁੰਨਾਂਗੇ,
ਦੁਨੀਆ ਕਮਲੀ ਨੂੰ ਤਪ-ਤੇਜ਼ ਵਿਖਾਵਾਂਗੇ।

ਨਿੱਜੀ ਸੇਵਾ ਖਾਤਰ ਹੋਵੇਗੀ ਅੱਲ੍ਹੜ,
ਉਸ ਕੋਲੋਂ ਨਾ ਕੋਈ ਭੇਦ ਛੁਪਾਵਾਂਗੇ।

ਮਾਇਆ ਤਾਈਂ ਆਖਾਂਗੇ, ਇਹ ਨਾਗਨ ਹੈ,
ਪਰ ਖ਼ੁਦ ਇਸ ਨੂੰ ਘੁੱਟ ਕਲੇਜੇ ਲਾਵਾਂਗੇ।

ਪਹਿਰਨ ਹੋਊ ਚਿੱਟਾ ਸੁੱਚਾ ਰੇਸ਼ਮ ਦਾ,
ਚੋਲ਼ੇ ਹੇਠਾਂ ਸਾਰੇ ਪਾਪ ਲੁਕਾਵਾਂਗੇ।

ਭੋਰਾ ਡਰ ਨਾ ਰੱਖਾਂਗੇ ਬਦਨਾਮੀ ਦਾ,
ਪੁੱਠੇ - ਸਿੱਧੇ ਸਾਰੇ ਤੀਰ ਚਲਾਵਾਂਗੇ।

ਮੌਜਾਂ ਲੁੱਟਾਂਗੇ ਡੇਰੇ ਦੇ ਵਿਚ 'ਸੂਫ਼ੀ',
ਜੇ ਫਸ 'ਗੇ ਤਾਂ ਜੇਲ੍ਹ 'ਚ ਆਸਣ ਲਾਵਾਂਗੇ।

ਚੱਲਦਾ >>>>