ਕਾਬੁਲ, 23ਅਗਸਤ (ਮੀਡੀਆ ਦੇਸ਼ ਪੰਜਾਬ ਬੀਊਰੋ): - ਕਾਬੁਲ ਵਿਚ ਇਨੀਂ ਦਿਨੀਂ ਚੋਣ ਮੁਹਿੰਮ ਜ਼ੋਰਾਂ 'ਤੇ ਹੈ ਅਤੇ ਇਹ ਕਾਬੁਲ ਦੇ ਇਤਿਹਾਸ ਵਿਚ ਪਹਿਲੀ ਵਾਰ ਹੈ ਕਿ ਕਿਸੇ ਚੋਣਾਂ ਵਿਚ ਕਿਸੇ ਸਿੱਖ ਉਮੀਦਵਾਰਾਂ ਦੇ ਪੋਸਟਰ ਦਿਖਾਈ ਦੇ ਰਹੇ ਹਨ। ਇਨ੍ਹਾਂ ਵਿਚੋਂ ਇਕ ਮਹਿਲਾ ਸਿੱਖ ਉਮੀਦਵਾਰ ਹੈ। ਅਫ਼ਗਾਨਿਸਤਾਨ ਦੇ ਵੋਲੇਸੀ ਜਿਰਗਾ ਦੇ ਉਮੀਦਵਾਰ ਪ੍ਰਿਤਪਾਲ ਸਿੰਘ ਪਾਲ ਅਤੇ ਅਨਾਰਕਲੀ ਕੌਰ ਹੋਨਾਰਿਆਰ ਅਫ਼ਗਾਨਿਸਤਾਨ ਦੇ ਸਿਆਸੀ ਇਤਿਹਾਸ ਵਿਚ ਚੋਣਾਂ ਲੜਨ ਵਾਲੇ ਪਹਿਲੇ ਸਿੱਖ ਉਮੀਦਵਾਰ ਹਨ। 250 ਮੈਂਬਰੀ ਸੰਸਦ ਦੇ ਹੇਠਲੇ ਸਦਨ ਦੀਆਂ ਚੋਣਾਂ 18 ਸਤੰਬਰ ਨੂੰ ਹੋਣੀਆਂ ਹਨ। ਜੇਕਰ ਇਹ ਉਮੀਦਵਾਰ ਜਿੱਤ ਜਾਂਦੇ ਹਨ ਤਾਂ ਉਹ ਅਫ਼ਗਾਨਿਸਤਾਨ ਦੇ ਸਾਂਸਦ ਬਣਨ ਵਾਲੇ ਪਹਿਲੇ ਗੈਰ ਮੁਸਲਿਮ ਜੇਤੂ ਉਮੀਦਵਾਰ ਹੋਣਗੇ। ਇਸ ਤੋਂ ਪਹਿਲਾਂ ਅਫ਼ਗਾਨਿਸਤਾਨ ਵਿਚ ਘੱਟ ਗਿਣਤੀ ਹਿੰਦੂਆਂ ਅਤੇ ਸਿੱਖਾਂ ਨੂੰ ਸੰਸਦ ਵਿਚ ਸਿੱਧੀ ਨਾਮਜ਼ਦਗੀ ਤਾਂ ਮਿਲਦੀ ਸੀ ਪਰ ਕੋਈ ਉਮੀਦਵਾਰ ਚੋਣਾਂ ਜਿੱਤ ਕੇ ਸੰਸਦ ਮੈਂਬਰ ਅੱਜ ਤੱਕ ਨਹੀਂ ਬਣਿਆ। ਇਹ ਦੋਵੇਂ ਸਿੱਖ ਉਮੀਦਵਾਰ ਆਜ਼ਾਦ ਉਮੀਦਵਾਰ ਵਜੋਂ ਚੋਣਾਂ ਲੜ ਰਹੇ ਹਨ। ਇਨ੍ਹਾਂ ਦਾ ਮੁਕਾਬਲਾ ਅਫ਼ਗਾਨਿਸਤਾਨ ਦੇ ਪੁਰਾਣੇ ਤਜਰਬੇਕਾਰ ਸਿਆਸਤਦਾਨਾਂ ਮੁਹੰਮਦ ਮੁਹਾਕੀਕ ਅਤੇ ਅਬਦੁਲ ਰਸੂਲ ਸਈਆਫ਼ ਨਾਲ ਹੈ। ਇਸ ਮੌਕੇ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਪ੍ਰਿਤਪਾਲ ਸਿੰਘ ਪਾਲ ਨੇ ਕਿਹਾ ਕਿ ਮੈਂ ਧਰਮ ਦੇਖੇ ਬਿਨਾਂ ਨਿਰਪੱਖਤਾ ਨਾਲ ਲੋਕਾਂ ਦੀ ਸੇਵਾ ਕਰਨੀ ਚਾਹੁੰਦਾ ਹਾਂ। ਮੈਂ ਸਿੱਖ ਹੋਣ ਨਾਲੋਂ ਪਹਿਲਾਂ ਇਕ ਅਫ਼ਗਾਨ ਹਾਂ। ਜ਼ਿਕਰਯੋਗ ਹੈ ਕਿ ਪ੍ਰਿਤਪਾਲ ਸਿੰਘ ਦੇ ਮਾਪੇ ਪਸ਼ਤੂਨ ਕੌਮ ਦੀ ਬਹੁਤਾਤ ਵਾਲੇ ਪਕਤੀਆ ਵਿਚ ਰਹਿਣ ਵਾਲੇ ਸਨ। ਪਾਲ ਇਕ ਆਯੂਰਵੈਦਿਕ ਦਵਾਈਆਂ ਦੀ ਦੁਕਾਨ ਚਲਾ ਰਿਹਾ ਹੈ ਜੋ ਕਿ ਉਸਦੇ ਪਿਤਾ ਜੀ ਨੇ ਪਕਤੀਆ ਤੋਂ ਕਾਬੁਲ ਆ ਕੇ ਖੋਲ੍ਹੀ ਸੀ। ਦੂਜੇ ਪਾਸੇ ਅਨਾਰਕਲੀ ਕੌਰ ਹੋਨਾਰਿਆਰ (26) ਕਾਬੁਲ ਦੀ ਜੰਮਪਲ ਹੈ। ਉਸਦੇ ਪਿਤਾ ਕ੍ਰਿਸ਼ਨ ਸਿੰਘ ਇਕ ਇੰਜੀਨੀਅਰ ਹਨ, ਜੋ ਕਿ ਖੋਸਤ ਸੂਬੇ ਤੋਂ ਕਾਬੁਲ ਵਸ ਗਏ ਸਨ। ਹੋਨਾਰਿਆਰ ਦੀ ਮਾਤਾ ਅਫ਼ਗਾਨੀ ਮੂਲ ਦੀ ਹੈ ਅਤੇ ਉਹ ਵੀ ਪਕਤੀਆ ਸੂਬੇ ਵਿਚ ਪੈਦਾ ਹੋਈ ਸੀ।

ਵਾਸ਼ਿੰਗਟਨ, 21ਅਗਸਤ (ਮੀਡੀਆ ਦੇਸ਼ ਪੰਜਾਬ ਬੀਊਰੋ): - ਵਾਈਟ ਹਾਊਸ ਨੇ  ਕਿਹਾ ਕਿ ਰਾਸ਼ਟਰਪਤੀ ਬਰਾਕ ਓਬਾਮਾ ਈਸਾਈ ਹਨ। ਉਹ ਰੋਜਾਨਾ ਪ੍ਰਾਰਥਨਾ ਕਰਦੇ ਹਨ। ਅਜਿਹਾ ਰਾਸ਼ਟਰਪਤੀ ਦੇ ਧਰਮ ਸਬੰਧੀ ਲੋਕਾਂ ਦੇ ਮਨਾਂ ਵਿਚੋਂ ਦੁਬਿਧਾ ਨੂੰ ਦੂਰ ਕਰਨ ਲਈ ਕੀਤਾ ਗਿਆ ਹੈ। ਇਸ ਬਾਰੇ ਕਰਵਾਏ ਸਰਵੇਖਣ ਮੁਤਾਬਕ 18 ਫੀਸਦੀ ਲੋਕ ਓਬਾਮਾ ਨੂੰ ਮੁਸਲਿਮ ਸਮਝਦੇ ਹਨ। ਸਰਵੇਖਣ ਦੇ ਨਤੀਜੇ ਦੇ ਮੱਦੇਨਜ਼ਰ ਵਾਈਟ ਹਾਊਸ ਦੇ ਬੁਲਾਰੇ ਬਿਲ ਬਰਟਨ ਨੇ ਇਹ ਸਪੱਸ਼ਟੀਕਰਨ ਦਿੱਤਾ। ਮਾਰਚ 2009 ਵਿਚ 11 ਫੀਸਦੀ ਲੋਕ ਉਨ੍ਹਾਂ ਨੂੰ ਮੁਸਲਿਮ ਸਮਝਦੇ ਸਨ। ਇਹ ਵੀ ਖੁਲਾਸਾ ਹੋਇਆ ਕਿ ਓਬਾਮਾ ਨੂੰ 34 ਫੀਸਦੀ ਲੋਕ ਈਸਾਈ ਮੰਨਦੇ ਹਨ ਜਦੋਂ ਕਿ 43 ਫੀਸਦੀ ਨੇ ਕਿਹਾ ਕਿ ਉਹ ਉਸ ਦੇ ਧਰਮ ਬਾਰੇ ਨਹੀਂ ਜਾਣਦੇ। ਬਰਟਨ ਮੁਤਾਬਕ ਅਮਰੀਕੀ ਨਾਗਰਿਕਾਂ ਨੂੰ ਰਾਸ਼ਟਰਪਤੀ ਦੇ ਧਰਮ ਦੀ ਬਜਾਏ ਦੇਸ਼ ਦੇ ਅਰਥਚਾਰੇ ਅਤੇ ਇਰਾਕ ਅਤੇ ਅਫਗਾਨਿਸਤਾਨ ਜੰਗਾਂ ਦਾ ਵਧੇਰੇ ਖਿਆਲ ਹੈ।

ਲੰਦਨ,20ਅਗਸਤ (ਮੀਡੀਆ ਦੇਸ਼ ਪੰਜਾਬ ਬੀਊਰੋ):  -ਇੰਗਲੈਂਡ ਰਾਸ਼ਟਰ ਮੰਡਲ ਖੇਡ (ਸੀ.ਜੀ.ਈ.) ਨੇ ਅਕਤੂਬਰ ਵਿੱਚ ਹੋਣ ਵਾਲੀਆਂ ਰਾਸ਼ਟਰ ਮੰਡਲ ਖੇਡਾਂ ਨੂੰ ਕਿਸੇ ਅੱਤਵਾਦੀ ਖ਼ਤਰੇ ਦੇ ਖਦਸ਼ੇ ਤੋਂ ਇਨਕਾਰ ਕੀਤਾ ਪਰ ਚਿਤਾਵਨੀ ਦਿੱਤੀ ਕਿ ਐਥਲੀਟਾਂ ਨੂੰ ਇਸ ਸਥਾਨ 'ਤੇ ਹੋਣ ਵਾਲੇ ਮੁਕਾਬਲੇ ਤੋਂ ਦੂਰ ਰੱਖਣ ਲਈ ਖਾਸ ਨਿਸ਼ਾਨਿਆਂ 'ਤੇ ਹਮਲਾ ਕੀਤਾ ਜਾ ਸਕਦਾ ਹੈ। ਇੱਕ ਰਿਪੋਰਟ ਮੁਤਾਬਿਕ ਸੀ.ਜੀ.ਈ. ਨੇ ਭਾਰਤ ਦੀ ਸੁਰੱਖਿਆ ਯੋਜਨਾ 'ਤੇ ਮੈਟਰੋਪੋਲਿਟਨ ਪੁਲਿਸ ਸਪੈਸ਼ਲਿਸਟ ਪ੍ਰੋਟੈਕਸ਼ਨ ਗਰੁੱਪ ਤੋਂ ਸਕਾਰਾਤਮਿਕ ਜਵਾਬ ਮਿਲਣ ਤੋਂ ਬਾਅਦ ਇੰਗਲੈਂਡ ਦੇ 17 ਰਾਸ਼ਟਰ ਮੰਡਲ ਖੇਡ ਮਹਾਸੰਘਾਂ ਨੂੰ ਪੱਤਰ ਲਿਖਿਆ ਹੈ।ਪਰ ਇਸ ਦੇ ਬਾਵਜੂਦ ਖਿਡਾਰੀਆਂ ਨੂੰ ਦਿੱਲੀ ਵਿੱਚ ਦਾਖਲ ਹੋਣ ਦੌਰਾਨ ਸਾਵਧਾਨ ਰਹਿਣ ਨੂੰ ਕਿਹਾ ਗਿਆ ਹੈ। ਸੀ.ਜੀ.ਈ. ਨੇ ਕਿਹਾ- ਖੇਡਾਂ ਨੂੰ ਕੋਈ ਅੱਤਵਾਦੀ ਖ਼ਤਰਾ ਨਹੀਂ ਹੈ। ਅਸੀਂ ਸੰਬੰਧਤ ਅਧਿਕਾਰਿਆਂ ਦੇ ਨਾਲ ਰਾਬਤਾ ਜਾਰੀ ਰੱਖਾਂਗੇ, ਖਾਸ ਕਰਕੇ ਦਿੱਲੀ ਆਯੋਜਨ ਕਮੇਟੀ ਦੇ ਨਾਲ ਜੋ ਖੇਡਾਂ ਦੌਰਾਨ ਸੁਰੱਖਿਆ ਮੁਹੱਈਆ ਕਰਾਉਣ ਲਈ ਜ਼ਿੇੰਮੇਵਾਰ ਹੈ।

ਸੰਯੁਕਤ ਰਾਸ਼ਟਰ, 20ਅਗਸਤ (ਮੀਡੀਆ ਦੇਸ਼ ਪੰਜਾਬ ਬੀਊਰੋ): ਪਾਕਿਸਤਾਨ ਦੇ ਵਿਦੇਸ਼ ਮੰਤਰੀ ਸ਼ਾਹ ਮਹਿਮੂਦ ਕੁਰੈਸ਼ੀ ਨੇ ਕਿਹਾ ਕਿ ਉਨ੍ਹਾਂ ਦਾ ਦੇਸ਼ ਅਤਿਵਾਦੀਆਂ ਨੂੰ ਦੇਸ਼ ਵਿਚ ਆਏ ਹੜ੍ਹ ਦੇ ਸੰਕਟ ਦਾ ਲਾਭ ਨਹੀਂ ਚੁੱਕਣ ਦੇਵੇਗਾ। ਪਾਕਿਸਤਾਨ ਵਿਚ ਆਏ ਹੜ੍ਹ ਦੀ ਸਥਿਤੀ 'ਤੇ ਵਿਚਾਰ ਵਟਾਂਦਰੇ ਲਈ ਸੱਦੀ ਗਈ ਵਿਸ਼ੇਸ਼ ਬੈਠਕ ਵਿਚ ਹਿੱਸਾ ਲੈਣ ਆਏ ਕੁਰੈਸ਼ੀ ਨੇ ਇਹ ਬਿਆਨ ਦਿੱਤਾ। ਕੁਰੈਸ਼ੀ ਨੇ ਸੰਯੁਕਤ ਰਾਸ਼ਟਰ ਮਹਾਂਸਭਾ ਵਿਚ ਕਿਹਾ ਕਿ ਉਨ੍ਹਾਂ ਦੇ ਦੇਸ਼ ਨੇ ਅਤਿਵਾਦੀਆਂ ਖਿਲਾਫ਼ ਕਾਮਯਾਬੀ ਹਾਸਲ ਕੀਤੀ ਹੈ ਅਤੇ ਪਾਕਿਸਤਾਨ ਇਸ ਸੰਕਟ ਨੂੰ ਅਤਿਵਾਦੀਆਂ ਲਈ ਮੌਕਾ ਨਹੀਂ ਬਣਨ ਦੇਵੇਗਾ। ਇਸ ਦੌਰਾਨ ਅਮਰੀਕਾ ਨੇ ਕੱਲ੍ਹ ਪਾਕਿਸਤਾਨ ਨੂੰ ਛੇ ਕਰੋੜ ਡਾਲਰ ਦੀ ਵਾਧੂ ਸਹਾਇਤਾ ਰਾਸ਼ੀ ਦੇਣ ਦਾ ਐਲਾਨ ਕੀਤਾ।