Ikk Gazal/ Kuljeet Kaur Gazal ਤਲਵੰਡੀ ਖੁੰਮਣ
mdp.pngscreenshot_2022-09-10_at_18-59-43_mediadespunjab_punjabi_newspaper_-_administration_joomla.pngਬੋਲੀ ਮੇਰੇ ਇਸ ਜਨਮ ਦੀ, ਕਾਗਜ਼ ਤੇ ਕਾਨੀ ਰਹਿਣ ਦੇ l
ਲੈ ਲੈ ਤੂੰ ਮੇਰੀ ਜ਼ਿੰਦਗੀ, ਕਾਗਜ਼ ਤੇ ਕਾਨੀ ਰਹਿਣ ਦੇ ll
 
ਸਭ ਹੀ ਨਿਕੰਮੇ ਜਾਪਦੇ, ਰੁਤਬੇ, ਮੁਰੱਬੇ, ਡਿਗਰੀਆਂ,
ਲੈ ਲੈ ਪੜ੍ਹਾਈ ਉਮਰ ਦੀ, ਕਾਗਜ਼ ਤੇ ਕਾਨੀ ਰਹਿਣ ਦੇ ll
 
ਨਦੀਆਂ, ਸਮੁੰਦਰ, ਧਰਤੀਆਂ, ਉੱਜੜੇ ਉੱਜੜਦੇ ਰਹਿਣਗੇ,
ਪਿੰਡ ਜਾਂ ਉਜਾੜੀਂ ਸ਼ਹਿਰ ਵੀ, ਕਾਗਜ਼ ਤੇ ਕਾਨੀ ਰਹਿਣ ਦੇ ll
 
ਸਾਂਭਣ ਫਿਰੇਂ ਤਾਂ ਸਾਂਭ ਲੈ, ਸਾਰੀ ਜ਼ਮੀਂ ਜਾਇਦਾਦ ਵੀ,
ਲੈ ਸਾਂਭ ਮੇਰੀ ਹਰ ਖੁਸ਼ੀ, ਕਾਗਜ਼ ਤੇ ਕਾਨੀ ਰਹਿਣ ਦੇ ll
 
ਕਾਹਤੋਂ ਹੈ ਮੁੱਖ ਤੂੰ ਫੇਰਿਆ, ਏਨਾ ਭਲਾ ਕਿਉਂ ਤਲਖਿਆ ?
ਏਨੀ ਕਰੀ ਸੀ ਬੇਨਤੀ, ਕਾਗਜ਼ ਤੇ ਕਾਨੀ ਰਹਿਣ ਦੇ ll
 
ਨ੍ਹੇਰਾ ਚੁਪਾਸੀਂ ਪਸਰਿਆ, ਚਾਨਣ ਕਰਾਂਗੇ ਆਪ ਹੀ,
ਲੈ ਜਾ ਤੂੰ ਆਪਣੀ ਰੌਸ਼ਨੀ, ਕਾਗਜ਼ ਤੇ ਕਾਨੀ ਰਹਿਣ ਦੇ ll
 
ਲਿਖਦੀ ਗ਼ਜ਼ਲ ਕੁਲਜੀਤ ਹੈ, ਸਦ ਹੀ ਡੁਬੋ ਕੇ ਰੱਤ ਵਿਚ,
ਇਹ ਨਾ ਕਦੇ ਵੀ ਮੁੱਕਣੀ, ਕਾਗਜ਼ ਤੇ ਕਾਨੀ ਰਹਿਣ ਦੇ ll
From Australia